Муҳиддин Мамажонов MPL 7`да жанг қилади, у жароҳат олган Жумаевнинг ўрнини тўлдиради + ПОСТЕР

Ўзбекистонлик аралаш яккакураш устаси Муҳиддин Мамажонов (3-0) 7 январь куни Тошкентда ташкил этилаган Muradov Professional League 7 мусобақаси доирасида октагонга кўтарилади. Бу ҳақда лиганинг Инстаграм тармоғидаги расмий саҳифаси хабар берди.

Унга кўра, Мамажонов жароҳат олиб сафдан чиққан Жаҳонгир Жумаев (8-3)нинг ўрнини тўлдиради ва россиялик Заур Исаев (10-5)га қарши жанг қилади.

Муҳиддин Мамажонов сўнгги жангини 2022 йил 21 май куни Қўқонда ташкиллаштирилган MPL 5 мусобақаси доирасида қирғизистонлик Елдияр Тообаев (2-2)га қарши ўтказиб, илк раундда рақибини техник нокаут билан мағлуб этган эди.

Заур Исаев эса сўнгги бор ўтган йилнинг 10 декабрь санасида Толстой-Юрт (Чеченистон)да ташкил этилган ACA Young Eagles 31 мусобақасида ҳамюрти Зелимхан Амиров (8-3)га қарши жанг қилиб, сабмишен билан мағлуб бўлган эди. Мазкур оқшом доирасида ҳамюртимиз Лазизхон Ўзбеков (5-3) Ислам Кончиев (9-3)га қарши октагонга кўтарилиб, ғалаба қозонганди.