Муҳриддин Тиловов Абу-Даби "Катта Дубулға" медали учун татамига чиқади

Ҳозиргина дунёнинг 4 қитъаси 29 мамлакатидан жами 219 (150 эркак, 69 аёл) нафар дзюдочи иштирок этаётган мазкур мусобақада биринчи кунги саралаш баҳслари якунига етиб, финал дастурида медаллар учун татамига чиқадиган жуфтликлар маълум бўлди. 

Мукофот жамғармаси 154 000 еврони ташкил қилувчи Абу-Даби "Катта Дубулға" турнирида 16 нафар дзюдочимизнинг баҳсларга киришиши ҳақида хабар берган эдик. Улардан 4 нафари бугун ўз иштирокини бошлади ва биргина Муҳриддин Тиловов кечки дастурда бронза медали учун татамига чиқиш ҳуқуқини қўлга киритди.  

-66 кг вазнда курашаётган тажрибали дзюдочимиз Қозоғистон ва франциялик рақибларини енгиб, 1/2 финалга етиб келганди. Афсуски, финал остонасида у IJF байроғи остида қатнашаётган россиялик Мурад Чопановга иппон баҳоси билан ютқазиб қўйди. Энди у бронза медали учун япониялик Такеши Такеокага қарши татамига чиқади.  

-60 кг вазндаги икки дзюдочимиз Самариддин Қўчқоров ва Камолиддин Бахтиёров аввалига 1/4 финалда, кейин эса бронза медали йўлидаги ўтиш беллашувларида рақибларига имкониятни бой бериб, мусобақадаги иштирокларини якунлашди.