Муҳсин Ҳисомиддинов Парижда тенгсиз + ФОТО

Айнан шу куни орзу ва муҳаббат рамзига айланган Эйфель минораси пойида нафақат кўҳна қитъанинг, балки дунёнинг энг забардаст полвонлари куч синашади. Нуфузли кураш байрамига йиғилганлар шиддатли ва жозибадор баҳсларга гувоҳ бўлиш билан бирга ўзбек маъданияти, санъати ва албатта миллий ҳунармандчилик кўргазмаларидан ҳам баҳраманд бўлишди.

Халқаро Кураш ассоциацияси тақвим режасидан ўрин олган Ўзбекистон Республикаси Президенти соврини учун халқаро турнирда дунёнинг 20 га яқин давлатларидан вакиллар иштирок этишди. Кураш баҳслари эса кутилганиданда шиддатли ва муросасиз бўлиб ўтди. 

Нафақат жаҳон чемпионлари, балки бошқа спорт турларидан ҳам номдор полвонлар, Олимпия ўйинлари иштирокчилари, қитъа ва дунёда тенгсиз деб топилган энг сара полвонлар ғолиблик учун гиламга чиқдилар.

Кураш бўйича 4 карра жаҳон чемпиони, 2 карра Осиё чемпиони, Осиё ўйинлари ғолиби Муҳсин Ҳисомиддинов ўз титулига Париж турнири ғолиблигини ҳам ёзишга муваффақт бўлди. У ярим финал баҳсида сербиялик Александр Калабични мағлубиятга учратди. 

Калабич ўтган йили Германиянинг Франкфурт шаҳрида бўлиб ўтган Ўзбекистон Республикаси Президенти соврини учун халқаро турнирнинг мутлоқ вазн тоифасида тенгсиз деб топилган эди. Шу йил Польшада бўлиб ўтган Европа ўйинлари доирасидаги Европа очиқ чемпионатида кумуш медални қўлга киритганди.

Муҳсин полвон финал баҳсида Европа очиқ чемпионати ғолиби Виктор Реско қаршилигини енгиб олтин медаль ҳамда 3000 евро пул мукофоти билан Тошкентга қайтадиган бўлди.

Аёллар ўртасидаги баҳслар янада қизиқарли ўтди. Унда германиялик Жасмин Грабовски финалда грузиялик Елена Кебадзени мағлубиятга учратди ва Париж турнири ғолиблигини қўлга киритди. Руминиялик Бьянка-Елена Продан ва кураш ватани вакиласи Ситора Ҳусановалар бронза медаллари билан тақдирланишди.

Ўзбекистоннинг Франциядаги элчихонаси ташаббуси билан турнир доирасида маданий тадбирлар ҳам ташкил этилди. Унда ўзбек санъатининг таниқли вакиллари ўз қўшиқлари билан иштирокчиларга ҳақиқий байрам кайфиятини туҳфа этишди.