Мурадовнинг оғир кунлари давом этмоқда. Маҳмуд Чехияда яшаш ҳуқуқидан маҳрум бўлди

Маълум бўлишича, 34 ёшли ўзбекистонлик UFC собиқ жангчиси уюшган жиноятчилар билан доимий алоқа ўрнатгани туфайли унга нисбатан Чехия суди мамлакатда доимий яшаш ҳуқуқидан маҳрум қилиш жазосини қўллаган.

Ёдингизда бўлса, май ойида ҳам Маҳмуд Чехияга кириш билан боғлиқ муаммоларга йўлиққан эди.

Чехия матбуотига кўра, мамлакат Бошпана ва миграция сиёсати департаменти спортчининг Чехияда вақтинча яшаш учун топширган аризасига рад жавобини берган. Мурадов эса департамент қарорига жавобан судга даъво аризаси киритган, аммо суд ҳукми ҳам унинг фойдасига ҳал бўлмагани ойдинлашди.

Маҳмуд Мурадов (26-8-0) фаолияти давомида UFC'да 4 та ғалаба ва 2 та мағлубият қайд этган. Унинг кейинги жанги 21 сентябрь куни Octagon 61 турнири доирасида британиялик Скотт Аскхэмга қарши бўлиши керак. Қизиғи, Octagon 61 турнири айнан Чехияда ташкил этилади. У айни дамда жанг учун Полшада машғулот олиб бормоқда.