Муроджон Аҳмадалиев иштирокида бирлаштирувчи жанг ташкил этилиши мумкин

"Matchroom Boxing" промоутерлик компанияси раҳбари Эдди Хирн ушбу жангни ташкил этишни режалаштирмоқда. 

Бу ҳақида Boxingnews24.com сайти хабар қилмоқда. 

Эдди Хирн Муроджон Аҳмадалиев ва WBO чемпиони Эммануель Наваррете ўртасида жанг ўтказишни истайди. Шунингдек, хабарда Наварретенинг бўйи Аҳмадалиевдан узунлиги, бу эса Муроджон учун қийинчилик туғдириши, ҳаттоки агар жанг ташкил этилса Наваррете нокаут эвазига ғалаба қозониши мумкинлиги ҳақида гап борган. Бу жангни ташкил этиш орқали Хирн таваккал қилиши мумкинлиги айтилади. 

Эслатиб ўтамиз, Аҳмадалиев шу йилнинг 30 январь куни америкалик Даниель Романни мағлубиятга учратиб, WBA ва IBF камарларини қўлга киритди. WBO камари соҳиби Наваррете эса 22 февраль куни Уайлдер - Фьюри андекардида ўз камарини ҳимоя қилади.

Кеча Хирн Аҳмадалиевнинг ҳимоя жангини Ўзбекистонда ўтказиши мумкинлиги, ушбу жанг оқшомида Исроил Мадримов ва Шаҳрам Ғиёсов ҳам рингга кўтарилиши мумкинлиги ҳақида хабар қилинганди.