Муроджон Аҳмадалиев жангга тайёргарлик ва рақиби ҳақида нималар деди?

Хабарингиз бор, турнир кардидан ҳамюртимиз Муроджон Аҳмадалиев иштирокидаги жанг ҳам ўрин олган. Икки йўналишда собиқ жаҳон чемпиони ўз камарларини қайтариб олиш учун илк қадамини ташлайди. Аҳмадалиев даъвогарлар жангида мексикалик Кевин Гонсалесга қарши рингга кўтарилади. 

Чарм қўлқоп устамиз кеча бир нечта медиа тадбирлар, хусусан face to face, матбуот анжуманида иштирок этди. Бугун боксчилар тарозидан ўтишади. Биз якшанба тонгидан ўрин олган муҳим жанг олдидан чарм қўлқоп устамиз билан боғланиб, тайёргарлик ҳақида сўрадик. 

"Албатта, мени фаолиятимдаги муҳим жанглардан бири кутиб турганини ҳис этиб турибман. Элиминатор жанги ғолиби чемпионлик камари учун рингга чиқиш ҳуқуқини қўлга киритади. Тайёргарлик ҳам шунга монанд тарзда бўлди. Тўғри, машғулот жараёнида ёнимда Шаҳрам Ғиёсов, Баҳодир Жалолов, Бектемир Мелиқўзиев, Исроил Мадримов, Элнур Абдураимов каби дўстларим тўлиқ бўлишмади. Лекин улар билан ҳар куни гаплашиб турдик. Мураббийларим билан биргаликда режа асосида тайёргарлик кўрдик. Рақиб мексикаликлигининг ўзи кўп нарсадан дарак беради. Мексикаликлар зарбаларга чидамли бўлишади. Аммо менга ҳозир рақибнинг фарқи йўқ. Чемпионлик камарларини қайтариб олиш учун астойдил киришганман. Бу йўлда биринчи навбатда Гонсалесни мағлуб этишим керак. Халқимиз дуо қилиб туришса, ҳаммаси яхши бўлади. Уларни хурсанд этиш учун боримни бераман", - деди Аҳмадалиев.

Эслатиб ўтамиз, ушбу жанг WBA камари учун Элиминатор, яъни саралаш вазифасини ўтаб беради.