Мустақил Ўзбекистон боксчилари Осиё ўйинларида (натижалар ва барча совриндорларимиз)

Ватанимиз мустақилликка эришганидан сўнг илк маротаба 1994 йилда терма жамоа сифатида Хиросимадаги Осиё ўйинларида иштирок этган.

Ўша мусобақада чарм қўлқоп усталаримиз 4 та медаль (2 та олтин ва 2 та бронза) қўлга киритишган:

Олтин: Алишер Авезбаев, Олег Маскаев

Бронза: Нариман Атаев, Дилшод Ёрбеков

Ўзбек боксчилари ўша Осиё ўйинларида умумжамоа ҳисобида тўртинчи ўринни эгаллашган.

1998 йилда Бангкок мезбонлик қилган Осиё Олимпиадаси 4 йил олдингига нисбатан муваффақиятли кечган. Боксчиларимиз умумий ҳисобда 9 та (3 та олтин, 4 та кумуш ва 2 та бронза) медалларига эга чиқишган.

Олтин: Муҳаммадқодир Абдуллаев, Сергей Михайлов, Руслан Чагаев

Кумуш: Тимур Туляков, Тўлқинбой Турғунов, Тимур Сулейманов, Дилшод Ёрбеков

Бронза: Наримон Атаев, Лазизбек Зокиров

Вакилларимиз ўшанда 9 та медаль қўлга киритиб медаллар сони бўйича биринчи бўлишган. Медаллар сифати бўйича эса мезбонлардан сўнг иккинчи ўринни эгаллаганмиз.

2002 йили Пусан мезбонлик қилган Осиё ўйинларида Ўзбекистон гегемонияси бошланган. Баҳсларда вакилларимиз 9 та медаль (5 та олтин, 1 та кумуш ва 3 та бронза) қўлга киритганлар.

Олтин: Дилшод Маҳмудов, Ўткирбек Ҳайдаров, Икром Бердиев, Сергей Михайлов, Рустам Саидов

Кумуш: Бекзод Хидиров

Бронза: Бахит Сарсекбаев, Шерзод Ҳусанов, Сирожиддин Наимов

Терма жамоамиз Жанубий Корея мезбонлик қилган Осиё ўйинларида медаллар сифати бўйича умумжамоа ҳисобида биринчи ўринни эгаллаган.

Қитъадаги етакчилик 2006 йилги Осиё ўйинларида ҳам давом эттирилади. Вакилларимиз Доҳа мезбонлик қилган мусобақадан 6 та (3 та олтин, 1 та кумуш ва 2 та бронза) медали билан қайтишган.

Олтин: Баҳодиржон Султонов, Элшод Расулов, Рустам Саидов

Кумуш: Жасур Матчанов

Бронза: Бекзод Хидиров, Дилшод Маҳмудов

Боксчиларимиз 6 та медални терма жамоамиз делегациясига қўшиб қўйишган ва умумжамоа ҳисобида биринчи бўлганлар.

2010 йилги Гуанчжоу мезбонлик қилган Осиё Олимпиадасидан вакилларимиз 5 та медаль (1 та олтин, 2 та кумуш ва 2 та бронза) билан қайтишган.

Олтин: Элшод Расулов

Кумуш: Ўктамжон Раҳмонов, Аббос Атоев

Бронза: Хуршид Тожибоев, Санжарбек Раҳмонов

Ўша йили боксчиларимиз умумжамоа ҳисобида тўртинчи поғонадан ўрин эгаллашган эди.

2014 йили Инчеон мезбонлик қилган Осиё ўйинлари ўзбекистонлик боксчилар учун энг муваффақиятсизи деб ҳисобласак бўлади. Умуман олганда, ўша Осиё ўйинлари икки йилдан кейин ўтказиладиган Рио Олимпиадаси учун «қурбон қилинган» десак адашмаймиз. Вакилларимиз 2014 йили Жанубий Кореядаги Осиё ўйинларидан 2 та кумуш ва 2 та бронза билан қайтганлар.

Кумуш: Шаҳобиддин Зоиров, Исроил Мадримов

Бронза: Ойбек Мамазулунов, Мирзоҳид Абдуллаев

Ўша Осиё ўйинларида боксчиларимиз умумжамоа ҳисобида 8-ўринни эгаллашган.

2018 йилги Осиё ўйинлари эса нафақат ўзбек бокси, балки бутун бошли ўзбек спорти тарихида ўзига хос из қолдирган. Ўша йили Индонезияда ўтказилган Осиё ўйинларида боксчиларимиз 7 та вазн тоифасида 7 та медаль (5 та олтин, 2 та кумуш) медалларига эга чиққанлар. Эътибор берган бўлсангиз, ҳар бир вазн тоифасида ўзбек боксчилари финалга қадар етиб борганлар.

Олтин: Жасурбек Латипов, Миразизбек Мирзаҳалилов, Иқболжон Холдоров, Бобоусмон Батуров, Исроил Мадримов

Кумуш: Ҳасанбой Дўсматов, Шунқор Абдурасулов

Боксчиларимиз Жакартадаги Осиё ўйинларида умумжамоа ҳисобида биринчи ўринни эгаллашган.

Статистикага назар ташлайдиган бўлсак, ўзбек боксчилари Осиё ўйинларида умумий ҳисобда 44 та медални делегациямиз ҳисобига қўшиб қўйган.

Шу жумладан:

19 та олтин

12 та кумуш

13 бронза.