Мюллер фаолиятидаги илк совринга Гонконгда эга чиқди

Франциялик теннисчи ҳал қилувчи финал баҳсида ATP рейтингида 106-поғонада бораётган япониялик Кеи Нишикорини уч сет натижасига кўра мағлубиятга учратди - 2/6, 6/1, 6/3. Бу теннисчиларнинг ўзаро ўтказган илк учрашуви бўлди. 

Бир юз тўрт дақиқа давом этган финалда Мюллер 4, Нишикори 6 та эйс зарбасини амалга оширган. Иккала теннисчи ҳам 2 тадан брейкка эга бўлган. 1 февраль куни 28 ёшга тўладиган Мюллер фаолиятидаги илк совринни қўлга киритди. 

Bank of China Hong Kong Tennis Open турниридаги муваффақиятли иштирок Мюллерга 250 рейтинг очкоси ва 103,455 АҚШ доллари миқдорида мукофот пули келтирди. Нишикори эса бир ҳафталик меҳнатидан 165 очко ҳамда $60,350 ишлаб олди.