Наманган вилояти ҳокими Янгиқўрғон туманига 100 млн сўмлик спорт жиҳозлари учун сертификат тақдим этди

Фестиваль доирасида оммавий спорт тадбирлари ҳам ташкил этилди.

Тадбир аввалида вилоят ҳокими янгиқўрғонлик волейболчи қизларни алоҳида эътироф этди ва улар эришаётган ютуқлар замирида маҳаллий мураббий Илҳомжон Турдиевнинг ҳиссаси катта эканлигини алоҳида таъкидлади.

—Чекка қишлоқларда спорт мана шундай фидойи инсонлар туфайли ривожланмоқда. Уларни эъзозлашимиз ва меҳнатини қадрлашимиз, бу каби мураббийлар сафини кенгайтириш ҳаракатида бўлишимиз керак, — деди вилоят ҳокими.

Шундан сўнг спортнинг оғир атлетика, волейбол, мини-футбол, стол тенниси, бокс каби турлари бўйича кўргазмали чиқишлар намойиш қилинди. Туманда ташкил этилган мусобақаларда ғолибликни қўлга киритган спортчиларга ташаккурномалар ва эсдалик совғалари топширилди.

Шу куннинг энг кульминацион воқеаси сифатида Наманган вилояти ҳокими Шавкатжон Абдураззақов Янгиқўрғон туманида жисмоний тарбия ва спорт тизимининг моддий-техник базасини мустаҳкамлаш учун 100 миллион сўмлик спорт жиҳозлари учун сертификатни топширди.