Наоя Иноуэ кейинги жангини қачон ва кимга қарши ўтказиши маълум

Мусобақанинг марказий жангида биринчи ярим енгил вазн тоифасида япониялик боксчи Наоя Иноуэ Филиппин вакили Марлон Тапалесга қарши рингга чиқди. WBC, WBO, WBA ва IBF чемпионлик камарлари учун кечган жангда Иноуэ муддатидан олдин ғалаба қозониб, ушбу вазндаги тўртта чемпионлик камарини бирлаштирди.

International Boxing News нашрининг маълум қилишича, Наоянинг навбатдаги жанги аниқ бўлиб улгурган. Япониялик боксчи кейинги жангини навбат бўйича WBC йўналишидаги мажбурий даъвогар, мексикалик Луис Нерига қарши ўтказади. Жангни май ойида ўтказиш режалаштирилмоқда.

Маълумот ўрнида, ушбу вазнда ўзбекистонлик боксчи Муроджон Аҳмадалиев WBA камари учун мажбурий даъвогар ҳисобланади. Иноуэ Нери устидан ғалаба қозонган тақдирда, навбат бўйича кейинги ҳимоя жангини Аҳмадалиевга қарши ўтказиши керак бўлади.