Навбатдаги мажлис: Ўзбекистонда Олимпиадага тайёргарлик асло сусайтирилгани йўқ

Ўзбекистон Республикаси Жисмоний тарбия ва спорт вазирлиги ҳамда Миллий олимпия қўмитаси томонидан тасдиқланган жадвалга мувофиқ, май ойининг сўнгги ҳафтасида Ўзбекистон бокс, дзюдо, каратэ WKF, оғир атлетика, қиличбозлик, гимнастика, велоспорт, Rowing&Canoe, сузиш, теннис, замонавийи бешкураш федерациялари, таэквондо WTF, спорт курашлари ҳамда Паралимпия ассоциациялари раҳбарияти, бош котиблари, бош тренерлар ва тренерлар билан ZOOM платформаси орқали йиғилишлар ўтказилди. Унда бевосита МОҚ президенти Р.Шоабдураҳмонов, Ўзбекистон Республикаси Жисмоний тарбия ва спорт вазирининг биринчи ўринбосари Р.Ирматов, МОҚ президенти маслаҳатчиси Н.Худайкулов, бошқарма бошлиғи А.Низаметдинов ва департамент директори А.Каримов иштирок этиб, ўқув-машғулот йиғинларини ташкил этиш, спортчиларнинг республика ва халқаро мусобақаларда иштирокини таъминлаш масалалари юзасидан муҳокама олиб боришди.

Мазкур йиғилишларда юқорида қайд этилган ҳар бир федерация ва ассоциация бош котиблари, бош тренерлари томонидан Олимпия ўйинларига лицензия олиши кутилаётган ҳар бир спортчиларнинг 2018-2020 йиллардаги натижалари, бугунги кундаги жисмоний ҳолати ва қўлга киритиши кутилаётган натижалари юзасидан ҳимоя-тақдимоти ва ҳисоботлари эшитилди.

Йиғилишларда, пандемия шароитида ўқув-машғулот йиғинларини ташкил этиш, спортчиларнинг республика ва халқаро мусобақаларда иштирокини таъминлаш юзасидан барча қизиқтириган саволларга Жисмоний тарбия ва спорт вазирлиги ҳамда МОҚ раҳбарияти томонидан асослантирилган жавоблар ва тавсиялар берилди.

Шунингдек, спорт федерациялари ва ассоциациялари раҳбарларига ҳимоя-тақдимот сифатида тайёрланган слайдлар ва ҳисоботларни баёнлаштириб, Жисмоний тарбия ва спорт вазирлиги ҳамда Ўзбекистон Миллий Олимпия қўмитасига тақдим этиш топширилди.