Навоий вилояти бўйлаб амалга оширилаётган ишлар ўрганилмоқда

Сафар давомида ҳудудда маҳалла ёшлари ўртасида ўтказилаётган “Маҳаллада футбол”, “Футболимиз келажаги”, “Чарм тўп”, шунингдек ишчи-ходимлар ўртасидаги “Ҳоким кубоги” ҳамда “Раҳбар кубоги” каби футбол мусобақаларининг ташкил этилиши жараёнларни кўздан кечирилиб, мавжуд муаммо ва камчиликларни ўрганиш режалаштирилган.

Кейинги йилларда республикамизнинг ҳар бир ҳудудларида бўлгани каби Навоий вилоятида ҳам болалар футболига бўлган эътибор кучаймоқда. Ҳар бир туманда, маҳаллаларда футбол майдончалари қурилмоқда. Аҳоли ўртасида турли мусобақалар ташкил этилиб, футболнинг оммалашуви йўлида кенг кўламли ишлар амалга оширилмоқда. 

Жумладан, Зарафшон шаҳри, Учқудуқ ва Томди туманларида маҳалла ёшлари ўртасида ўтказилаётган “Футболимиз келажаги”, “Маҳаллада футбол”, “Чарм тўп” мусобақаларига ҳам катта қизиқиш билан қаралди. Буни ушбу мусобақаларда тумандаги барча маҳалла, овул ҳамда посёлка фуқаролар йиғинларидан жамоалар иштирок этганидан ҳам билиб олиш қийин эмас.

Айни пайтда бутун Навоий бўйлаб футбол мусобақаларининг ҳудудий босқичлари ўтказилмоқда. Ғолиблар Навоий шаҳрида вилоят босқичи ғолиблиги учун курашиш мақсадида жам бўлади.