Навоийда “Save Aral” марафони ўтказилди

“Ўзбекистон Республикасида жисмоний тарбия ва спортни янада такомиллаштириш ва оммалаштириш чора-тадбирларни тўғрисида”ги Президент фармони ижросини таъминлаш мақсадида республикамиз бўйлаб спорт тадбирлари ва мусобақалар мунтазам ўтказиб келинмоқда. Жумладан, Навоий вилоятида ҳам аҳолининг барча қатламини жисмоний тарбия ва оммавий спортга жалб қилиш бўйича кўплаб ишлар олиб борилмоқда. 

Жисмоний тарбия ва спорт вазирлиги, Миллий олимпия қўмитаси, Ўзбекистон енгил атлетика ва триатлон федерациялари ҳамда Навоий вилояти ҳокимлиги ҳамкорлигида ўтказилган “Янги нафас” дастури доирасидаги “Save Aral” марафони ҳам шулар жумласидан. 

Марафон Навоий шаҳридаги “Ўзбекистон“ кинотеатри биноси ёнидан старт олиб, иштирокчилар уч километрлик масофани босиб ўтдилар. Оммавий марафонда давлат ва жамоат ташкилотларининг раҳбарлари ҳамда ходимлари, аҳолининг турли қатламлари, 7 ёшдан 70 ёшгача бўлган беш минг нафардан ортиқ аҳоли иштирок этди.

Мусобақа якунида ғолибликни қўлга киритган иштирокчилар қимматбаҳо совғалар билан тақдирланишди. 

Маълумот учун: ушбу лойиҳа Президент фармони ижросини таъминлаш мақсадида ташкил этилган бўлиб, “Save Aral” марафонига Андижонда старт берилган эди. Мамлакатимизнинг 19 шаҳрида ўтказиладиган марафонга Қорақалпоғистон Республикаси Мўйноқ шаҳрида якун ясалади.