Ниғматов Минск турнирида 4та партия ўтказди, бугун яна шунча ўйин бор

Ушбу мусобақада юртимиз шарафини ФИДЕ устаси Ортиқ Ниғматов ҳимоя қиляпти. Ёш шахматчимиз яқинда пойтахтимизда ўтказилган Ўзбекистоннинг биринчи гроссмейстери Георгий Агзамов хотирасига бағишланган “Тошкент-Опен 2018” халқаро турнирида кумуш медални қўлга киритганди. 

Минск мусобақасининг дастлабки куни шахматчилар 4тадан партияда дона суришди. Ниғматов икки учрашувда ғалаба қозониб, бир ғалаба ва мағлубият қайд этди. У қора доналарда ҳаракат қилишига қарамай халқаро гроссмейстер Рауф Мамедов (Озарбайжон, 2711) билан дуранг ўйнашга муваффақ бўлди.

Бугун яна 4та партия ўтказилади. Ҳозирча Ортиқ Ниғматов 4 имкониятдан 2,5 очкога эга бўлиб турибди. Минск турнири ғолиби 2000 АҚШ доллари ва кубокни қўлга киритади. Кучли олтиликдан жой олган шахматчиларга пул мукофоти таъсис этилган.

Халқаро турнирда 7 давлатдан жами 96 нафар иштирокчи дона суради. Халқаро гроссмейстерлар - Антон Коробов (Украина, 2736), Дмитрий Андрейкин (Россия, 2733), Сергей Жигалко (Беларусь, 2724), Рауф Мамедов (Озарбайжон, 2711) сингари шахмат юлдузларининг иштирок этаётгани мусобақа нуфузидан дарак бериб турибди.