Ниғматов Минск турнирининг 18 ёшлилар мусобақасида чемпион бўлди

Ушбу мусобақада юртимиз шарафини ФИДЕ устаси Ортиқ Ниғматов ҳимоя қилди. Турнирда халқаро гроссмейстерлар - Антон Коробов (Украина, 2736), Дмитрий Андрейкин (Россия, 2733), Сергей Жигалко (Беларусь, 2724), Рауф Мамедов (Озарбайжон, 2711) сингари шахмат юлдузларининг иштирок этаётгани мусобақа нуфузидан дарак бериб турибди.

Турнирнинг сўнгги куни шахматчилар 9-10 ва 11-турларда ўзаро баҳс олиб боришди. Ниғматов охирги учта партиянинг барчасида рақибларини мағлубиятга учратиб, якунда 8 очко жамғаришга муваффақ бўлди. Бу натижаси эвазига у 18 ёшгача бўлган шахматчилар орасида чемпионга айланди. 

Ҳамюртимиз умумий турнирда халқаро гроссмейстерларни ортда қолдириб, совринли бешинчи ўринни эгаллади. Тўртинчи ўриндан жой олган беларуслик гроссмейстер Алексей Фёдоров ҳам Ниғматов сингари 8 очко тўплади. 

Турнирнинг биринчи рақамли иштирокчиси халқаро гроссмейстер Рауф Мамедов (Озарбайжон, 2711) 9,5 очко билан мусобақа ғолиблигини қўлга киритди. Ортик Ниғматов 3-турда Мамедов билан дуранг ўйнаганди.