Нигора Сувонова – Жаҳон кубоги совриндори!

Унда Ўзбекистон терма жамоаси аъзолари ҳам муносиб иштирок этишмоқда. 71 кг вазн тоифасида супачага чиққан қизлар баҳсида Нигора Сувонова кумуш медалига сазовор бўлди. Эътиборлиси, 15 ёшли вакиламизнинг асосий рақиблари ўзидан икки ёш катта қизлар эди.

Дастлаб даст кўтариш машқида ўзини синаб кўрган ҳамюртимиз икки уринишни ўзига бўйсиндирди ва 91 кг натижа кўрсатиб, асосий рақиби филиппинлик 17 ёшли Ванесса Сарнога 2 кг (93 кг)га имкониятни бой берди. 3-ўрин 90 кг тошни даст кўтарган Океания минтақаси вакили, наурулик Нэнси Абоукуга насиб этди.

Силтаб кўтариш машқида ҳам айни ушбу уч атлет ғолиблик учун кураш олиб борди. Ванесса барча ҳаракатларини муваффақиятли бажариб, 118 кг билан ғолиб чиқди. Иккинчи ўрин вакиламизга насиб этди. У 119 кг лик учинчи уринишни амалга ошира олмади, 117 кг билан кифояланди. Бронза медали 110 кг ли уринишини муваффақиятли якунлаган наурулик қизга насиб этди.

Шундай қилиб икки кураш якунига кўра, филиппинлик Ванесса Сарно 211 кг (93+118) билан олтин, ҳамюртимиз Нигора Сувонова 208 кг (91+117) билан кумуш, наурулик Нэнси Абоуку 200 кг (90+110) билан бронза медалига сазовор бўлди.

Эслатиб ўтамиз, бундан аввал 55 кг гача бўлган вазн тоифасида супачага кўтарилган Ҳусенбой Матрасулов даст кўтариш машқида фахрли 1-ўринни, шу вазнда Нигора Абдуллаева икки кураш машқи якуни бўйича олтин медални қўлга киритган эди.