Ниҳоят, "Жангчилар ороли"нинг қаерда жойлашгани маълум + ФОТО

Ниҳоят, барчадан сир сақланиб келинаётган ушбу мўъжаз орол жойлашган манзил ошкор бўлди. "Жангчилар ороли" БАА пойтахти Абу-Даби шаҳрига яқин жойдаги оролда жойлашган деб хабар бермоқда Globo Esporte.

БАА ҳудудида 200га яқин турли катта-кичик ороллар мавжуд бўлиб, Дэна Уайт улардан бирини ижарага олди. Энди у бир нечта UFC турнирларини айнан шу оролда ўтказади. Бу ерга АҚШ ва бошқа давлат жангчилари бемалол келиб, ўз жангларини ўтказиши мумкин. Фақат карантин назорати ўта кескин кўринишда бўлади. 

Жумладан, "Жангчилар ороли"га келаётган ҳар бир спортчи ва мураббийлар икки ҳафта давомида карантинда бўлишади. Уларнинг ҳар бири коронавирусга қарши тест топширади. Таҳлил натижалари эълон қилинганидан кейингина спортчига жанг ўтказиши учун рухсат берилади. 

Хабарда айтилишича, "Жангчилар ороли"даги илк турнир 27 июнь куни бўлиб ўтади. UFC промоушени ушбу оролда камида август ойигача турнирларни ташкил қилади.