Нима учун бразилиялик Олимпиада чемпиони FIFA томонидан Fair Play совринига лойиқ кўрилди?

Жорий йилнинг бошида Бразилиянинг жанубий қисмидаги сув тошқинларида Порто Алегре шаҳри футболчилари энг яхши инсоний фазилатларини намоён этди.

"Интернаcионал" жамоаси аъзоси Тиаго Майя шаҳар аҳолисига ёрдам бериш учун кўчага чиққан футболчилардан бири эди ва унинг саъй-ҳаракатлари ФИФА томонидан Fair Play мукофоти билан тақдирланди.

2016 йилда Бразилия терма жамоаси билан Олимпия ўйинлари олтин медалини қўлга киритган ярим ҳимоячи сув босган бинодан кекса аёлни орқасига опичлаб олиб чиқиб кетаётган видео ижтимоий тармоқда тарқалиб, кўпчиликнинг ҳайрат ва таҳсинига сазовор бўлди.

Натижада у ФИФА томонидан мукофотга лойиқ кўрилди. Мазкур соврин футболчи, мураббий, жамоа, ҳакам, мухлис ёки мухлислар гуруҳига майдон ичида ёки ташқарисидаги намунавий ва адолатли хатти-ҳаракатлари учун бериладиган шарафли унвон ҳисобланади.

"Мен ўзимни қаҳрамон деб ҳисобламайман. Ота-онам менга доимо, вазият қандай бўлишидан қатъи назар, қўшниларимни севишни ўргатишган. Бир куни уйда уйғониб, "Мен уйда ўтиролмайман, одамларга менинг ёрдамим керак," деган қарорга келдим. Ҳатто Эвайр хоним учрашганимизда мени ўзининг қаҳрамони деб атайди. Мен унга, "Йўқ, Эвайр хоним, менинг ўрнимда бўлганингизда, сиз ҳам мен учун худди шундай қилган бўлардингиз," дейман. Сув тошқинидан сўнг футболни ташламоқчи бўлдим. Бу воқеа менга руҳий жиҳатдан жуда катта таъсир кўрсатди. Лекин зарурат туғилса, бу ишни яна такрорлаган бўлардим."