Нодирбек Абдусатторов 3-ўринни эгаллаган турнирда чемпион аниқланди

Умумий мукофот жамғармаси 500 000 АҚШ долларини ташкил этган ушбу мусобақанинг финал босқичида дунёнинг саккиз нафар кучли гроссмейстери бош соврин учун баҳс олиб борди. Улар қаторида ҳамюртимиз Нодирбек Абдусатторов (2727) ҳам муваффақиятли иштирок этиб, якунда 1/2 финалга қадар етиб борган ҳолда 3-ўринни эгаллади. 

Ҳал қилувчи финал учрашувининг биринчи сетида амалдаги жаҳон чемпиони Магнус Карлсен америкалик Уэсли Сони 2,5:1,5 ҳисобида мағлубиятга учратган эди. Иккинчи сетда ҳам сценарий ўзгармади. Норвегиялик гроссмейстер худди биринчи сетда бўлган ҳисобда зафар қучиб, мусобақа ғолибига айланди. 

Магнус Карлсен ушбу турнирнинг уч карра чемпиони бўлиш баробарида 200 000 АҚШ доллари миқдоридаги мукофот пулини ҳам қўлга киритди. Вице-чемпион Уэсли Со эса 100 000 долларга эга чиқди. Учинчи ўринни эгаллаган ҳамюртимиз Нодирбек Абдусатторов эса 50 000 долларни ўз ҳисоб рақамига ёзиб қўйди.