Нодирбек Абдусатторов FIDE Freestyle Chess Жаҳон чемпионатида иштирок этади

Онлайн тарзда ўтган икки кунлик саралаш турнирининг биринчи куни Абдусатторов 9 имкониятдан 7 очко жамғарган ҳолда қўшимча кўрсаткичларга кўра 1-ўрин билан саралашнинг финал раундига йўл олганди. 

Кеча оқшом Нодирбек аввалига 1/2 финалда эронлик Амин Табатабайини 1,5:0,5 ҳисобида таслим этди. Саралашнинг финал учрашувида эса ҳиндистонлик гроссмейстер Пранавни ҳар икки партияда ҳам мағлубиятга учратиб, саралаш босқичи ғолиби сифатида FIDE Freestyle Chess Жаҳон чемпионати йўлланмасини қўлга киритди. 

Шу тариқа, Жаҳон чемпионатининг барча саккиз нафар иштирокчиси аниқланди. Аввалроқ Магнус Карлсен (Норвегия), Левон Аронян, Фабиано Каруана, Ҳанс Ниеманн (уччаласи ҳам АҚШ), Винсент Кеймер (Германия), Аржун Эргаиси (Ҳиндистон) ва ҳамюртимиз ўтган йилги жаҳон Кубоги соҳиби Жавоҳир Синдаров FIDE Freestyle Chess Жаҳон чемпионати иштирокчисига айланганди.