Нодирбек Абдусатторов FIDE World Chess Cup мусобақасида қатнашади

Гап шундаки, ФИДЕнинг Марказий Осиё 3.4 ҳудуди президенти Ҳусан Турдиалиев номидан ушбу ташкилот президенти Аркадий Дваркович номига бир неча бор илтимоснома юборилганди. Унга кўра шахмат бўйича Ўзбекистон миллий терма жамоаси аъзоси, халқаро гроссмейстер, бутунжаҳон шахмат олимпиадаси ғолиби Нодирбек Абдусатторовнинг сўнгги йилларда кўрсатган натижалари ҳамда унинг имкониятларини ҳисобга олиб, FIDE World Chess Cup мусобақасида қатнашишга муносиб номзод эканлиги аниқ фактлар билан асослаб берилганди.

Маълумки, ушбу мусобақага белгиланган квоталардан ташқари ФИДЕ президенти ҳам 5 нафар иштирокчини мустақил тавсия этиш ҳуқуқига эга. Улардан 4 нафари аллақачон маълум бўлиб улгурган, аммо охирги ўрин учун асосий даъвогарлар орасида ҳамюртимиз Нодирбек Абдусатторов ҳамда Ҳиндистон вакили Ниҳал Сарин номзоди илгари сурилаётган эди.

Қилинган ҳаракатлар натижаси ўлароқ халқаро гроссмейстер Юдит Полгар, халқаро гроссмейстер Владимир Крамник, ФИДЕ ижрочи директори, халқаро гроссмейстер Виорел Балаган бошчилигидаги Комиссия Ҳиндистон вакили Ниҳал Сарин ҳамда ўзбекистонлик Нодирбек Абдусатторовларнинг натижаларини кўриб чиқиб, унга кўра халқаро гроссмейстер Нодирбек Абдусатторовни FIDE World Chess Cup турнирида иштирок этишга тавсия қилди. Шу тариқа ватандошимиз ушбу нуфузли беллашувда қатнашиш ҳуқуқини қўлга киритди.

Маълум бўлишича, мусобақа 9 сентябрдан 4 октябрга қадар Россия Федерациясининг Ханты-Мансийск шаҳрида бўлиб ўтади. Таъкидлаш жоиз, нуфузли турнирда Ўзбекистон номидан шахмат бўйича 17-жаҳон чемпиони, халқаро гроссмейстер Рустам Қосимжонов ҳам иштирок этади.