Нодирбек Абдусатторов номдор рақибларини мағлубиятга учратди

Мукофот жамғармаси 150 минг АҚШ долларини ташкил этувчи мазкур турнирда сайёрамизнинг энг кучли гроссмейстерлари иштирок этяпти. Улар орасида ҳамюртимиз, рапид йўналиши бўйича амалдаги ва шу билан бирга энг ёш жаҳон чемпиони Нодирбек Абдусатторов (2651) ҳам бор.

Кеча тунда дунёнинг 16 нафар кучли гроссмейстерлари яна 4 та партияда ўзаро дона суришди ва қувонарлиси, Абдусатторов ўтказилган партияларида мағлубиятга учрамади. Аксинча, рейтингда ўзидан юқорида турган номдор рақибларидан очко тортиб олди. 

Ёш гроссмейстеримиз 9-турда ҳиндистонлик Прагнанандха (2612) билан дуранг ўйнади. 10-турда вьетнамлик Лием Куанг Ле (2709) устидан чиройли ғалабага эришди. Кейин мусобақа жадвалида 3-ўринда бораётган канадалик Эрик Хансен (2606)ни мағлубиятга учратди. 12-турда эса хитойлик Лирен Динг (2799) билан муросага келди. Нодирбек 4 та партияда 2 ғалаба ва 2 дуранг қайд этди. 

Маълумот учун, 16 халқаро гроссмейстер иштирокидаги мусобақа рапид йўналишида ўтказаётган бўлиб, дастлаб иштирокчилар 15 турдан иборат саралаш босқичида ўзаро куч синашади. Шахматчилар тўплаган ҳар бир очкоси учун 250 доллардан мукофот олишади. Саралаш босқичи якунига кўра энг яхши натижа қайд этган 8 нафар шахматчи плей-офф босқичида ғолиблик учун кураш олиб боради. Бу босқичда ҳар бир ўйин муҳим аҳамиятга эга ва ютқазган шахматчи учун мусобақа тугайди.

Эслатиб ўтамиз, яқинда Польшада ўтказилган жаҳон чемпионатида Нодирбек Абдусатторов Магнус Карлсенни шов-шувли тарзда мағлубиятга учратган эди. Ўша ғалаба тасодифий бўлмагани кечаги учрашувда ўз исботини топди.