Нодирбек Абдусатторов ўзбек шахматчилари орасида яна бир тарихий натижа қайд этди

Қувонарлиси, тарихда илк бор ўзбек шахматчиси дунё рейтингининг Топ-4'талигига кирди. Аслида 19 ёшли Нодирбек Абдусатторов февраль ойидаёқ Топ-10`таликка кириб, ўзбек шахматчилари учун рекордни янгилаган эди. Унинг ўзи кеча эълон қилинган янги рейтингда ўша рекордни янгилаб қўйди. Бунгача ўзбек шахматидаги энг яхши натижа Рустам Қосимжоновга тегишли бўлиб, у 2715 очко билан жаҳон рейтингида 11-ўринда қайд этилганди. 

Яқинда Prague Chess Festival ғолиби бўлган Нодирбек 2765 очко билан 4-ўринга кўтарилди. Бу Топ-10`таликдаги энг катта ўсиш бўлди. Рейтингни ҳамон жаҳон чемпиони Магнус Карлсен бошқармоқда. Норвегиялик гроссмейстер Самарқандда ўтган рапид ва блиц йўналиши бўйича FIDE жаҳон чемпионатида ғолибликни қўлга киритиб, ҳар икки йўналишда ўз чемпионлигини ҳимоя қилганди. 

Америкалик гроссмейстерлар Фабиано Каруана янгиланган рейтингда иккинчи, Ҳикару Накамура учинчи ўринни банд этган. Топ-10`таликдан Динг Лирен (Хитой), Алиреза Фирузжа (Франция), Ян Непомняший (Россия), Уэсли Со (АҚШ), Аржун Эригаиси (Ҳиндистон) ва Йи Вей (Хитой) жой олган. Вишванатан Ананд 11-ўринда қайд этилган.    

Янгиланган FIDE рейтинги (Топ-10):

1. Магнус Карлсен (Норвегия, 2830)

2. Фабиано Каруана (АҚШ, 2803)

3. Ҳикару Накамура (АҚШ, 2789)

4. Нодирбек АБДУСАТТОРОВ (Ўзбекистон, 2765)

5. Динг Лирен (Хитой, 2762)

6. Алиреза Фирузжа (Франция, 2760)

7. Ян Непомняший (Россия, 2758)

8. Уэсли Со (АҚШ, 2757)

9. Аржун Эригаиси (Ҳиндистон, 2756)

10. Йи Вей (Хитой, 2755)

Ўзбек шахматчиларининг рейтингдаги ўрни:

4. Нодирбек Абдусатторов (2765)

48. Рустам Қосимжонов (2685)

50. Жавоҳир Синдаров (2684)

69. Нодирбек Якуббоев (2665)