Нодирбек Абдусатторов Руминия турнири 6-турида Гири билан ўйнади + ФОТО

Ўз ичига 5 та турнирни жамлаган ушбу нуфузли шахмат мусобақасининг умумий мукофот жамғармаси 1,5 миллион АҚШ долларини ташкил этади. Унда ҳамюртимиз Нодирбек Абдусатторов (2766) ҳам ўз маҳоратини намойиш этяпти. Кеча 6-турда у оқ доналарда Аниш Гири (Нидерландия, 2745)га қарши баҳс олиб борди ва яна дурангга имзо чекди.   

Турнирнинг биринчи рақамли иштирокчиси Фабиано Каруана (АҚШ, 2805) ҳам оқ доналарда FIDE байроғи остида ўйнаётган россиялик Ян Непомняший билан муросага келди. Ушбу турда биргина франциялик Алиреза Фирузжа ғалабага эришди. У америкалик Уэсли Содан устун келди. Қолган партияларда томонлар дурангга имзо чекишди. 

6-турдан сўнг турнир жадвалида Каруана 4 очко билан якка пешқадамликни давом эттирмоқда. Фирузжа, Праггнанандҳа ва Гукеш ҳисобида 3,5 тадан очко бор. Нодирбек Абдусатторов 2,5 очко билан қўшимча кўрсаткичларга кўра 8-ўринни эгаллаб турибди. Уэсли Со ва Аниш Гири ҳисобида ҳам 2,5 очкодан бор. Бугун Нодирбек 7-турда қора доналарда айнан Сога қарши баҳс олиб боради. 

Маълумот учун, "Superbet Chess Classic Romania" турнирининг мукофот жамғармаси 350 000 АҚШ долларини ташкил қилади. Чемпион гроссмейстер 100 000 долларни қўлга киритади.