Нодирбек Абдусатторов Руминия турнирида бир поғона юқорилади

Ўз ичига 5 та турнирни жамлаган ушбу нуфузли шахмат мусобақасининг умумий мукофот жамғармаси 1,5 миллион АҚШ долларини ташкил этади. Унда ҳамюртимиз Нодирбек Абдусатторов (2766) ҳам ўз маҳоратини намойиш этяпти. Кеча 4-турда у оқ доналарда Максим Вашье-Лаграв (Франция, 2732)га қарши баҳс олиб борди ва дурангга имзо чекди.   

Турнирнинг биринчи рақамли иштирокчиси Фабиано Каруана (АҚШ, 2805) руминиялик Богдан-Даниэль Дякни мағлуб этиб, 3 очко билан якка пешқадам бўлиб олди. Ҳиндистонлик Доммаражу Гукеш франциялик Алиреза Фирузжа билан муросага келди. Яна бир ҳинд шахматчиси Рамешбабу Прагнандҳа нидерландиялик Аниш Гирини енгиб, очколарини 2,5 тага етказиб олди. 

Бугун Нодирбек 5-турда қора доналарда Гукешга қарши баҳс олиб боради. Ҳинд гроссмейстери 2,5 очко билан қўшимча кўрсаткичларга кўра 3-ўринни эгаллаб турибди. Абдусатторов эса 1,5 очко билан 8-ўринга кўтарилиб олди.   

Маълумот учун, "Superbet Chess Classic Romania" турнирининг мукофот жамғармаси 350 000 АҚШ долларини ташкил қилади. Чемпион гроссмейстер 100 000 долларни қўлга киритади.