Нодирбек Абдусатторов Saint Louis Rapid & Blitz турниридаги иштирокини бошлади

Saint Louis Rapid & Blitz мусобақаси "Grand Chess Tour" лойиҳаси доирасидаги тўртинчи турнир бўлиб, унинг мукофот жамғармаси 175 000 АҚШ долларини ташкил қилади. Кеча бошланган турнирнинг ғолиб ва совриндорлари 16 август куни маълум бўлади. Бош соврин учун биринчи рақамли шахматчимиз Нодирбек Абдусатторов ҳам курашга киришди.  

Турнир айланма форматда, рапид ва блиц йўналишларида вақт назоратида ўтказиляпти. Гроссмейстерлар 9 тур рапид. 18 тур блиц йўналишида ўзаро дона суришади. Мусобақанинг дастлабки уч куни рапид, қолган икки куни блиц баҳслари ташкил этилади. Рапид қисмидаги ғалабага 2, дурангга 1 очко берилади. 

Турнир иштирокчилари: Нодирбек Абдусатторов (Ўзбекистон), Левон Аронян, Фабиано Каруана, Ҳикару Накамура, Леньер Домингес, Уэсли Со (ҳаммаси АҚШ), Максим Вашье-Лаграв, Алиризо Фирузжа (иккиси Франция), Ян Непомняший (FIDE), Рамешбабу Прагнанандҳа (Ҳиндистон)

Мусобақанинг илк куни шахматчилар 3 та турда тўқнаш келишди. Нодирбек Абдусатторов 1 тадан ғалаба, дуранг ва мағлубият қайд этди. Ҳамюртимиз мезбонлар вакили Ҳикару Накамурани мағлуб этишни уддалади. Франциялик Максим Вашье-Лагравга имкониятни бой берди. Леньер Домингез билан муросага келди. У 3 очко билан қўшимча кўрсаткичларга кўра 5-ўринни эгаллаб турибди.