Нодирбек Абдусатторов Шуша турнирида иккинчи ўринни эгаллади + ФОТО

Мусобақа рапид ва блиц йўналишларида ўтказилиб, ғолиб ва совриндорлар икки турнирнинг умумий натижалари йиғиндисига кўра аниқланди. Ўз тарихида 10-маротаба ташкил этилган ушбу нуфузли турнирда жами 8 нафар гроссмейстер, улар қаторида ҳамюртимиз Нодирбек Абдусатторов ҳам иштирок этди. Мамлакатимизнинг биринчи рақамли шахматчиси мазкур мусобақанинг 2022 йилги чемпиони ҳисобланади. 

Нодирбек блиц баҳсларида ажойиб натижа қайд этди. У 10 очко жамғариб, блиц йўналишида 1-ўринни эгаллади. Россиялик Ян Непомняший иккинчи, ҳиндистонлик Аравиндҳ Читамбарам учинчи ўринни банд этди. Абдусатторов рапид баҳсларида 8 очко билан 4-поғонадан жой олди. Унинг умумий турнир чемпионлиги учун бир очко етмай қолди. Нодирбекдан бир очко кўп жамғарган Ян Непомняший 10-юбилей турнир чемпионига айланди. 

Маълумот учун, норвегиялик Магнус Карлсен турнирнинг 4 карра ғолиби ҳисобланади. Шахрияр Мамедьяров икки бор чемпионликка эришган бўлса, Фабиано Каруана (АҚШ), Нодирбек Абдусатторов (Ўзбекистон) ва Видит Сантош (Ҳиндистон) бир маротабадан бош совринга эга чиққан. Чемпионлар сафига FIDE байроғи остида ўйнаган россиялик Ян Непомняший ҳам қўшилди.       

Дарвоқе, Нодирбек Абдусатторов Бутунжаҳон шахмат Олимпиадасидан Тошкентга қайтиб, аэропортда ташкил этилган тақдирлаш маросимида қатнашиб, ҳатто уйига ҳам бормай, яна самолётда Бокуга жўнаб кетганди. Чарчоқ аломатларига қарамай, ёш гроссмейстеримиз Вугар Гашимов хотира турнирида жуда яхши натижа кўрсатди. Ян Непомняший эса Шахмат Олимпиадасида иштирок этмади ва Бокуга ҳар томонлама кучга тўлган ҳолда келганди.