Нодирбек Абдусатторов Шуша турнирининг кечаги баҳсларида икки ғалаба қайд этди + ФОТО

Шу билан бирга мусобақанинг рапид баҳсларига ҳам якун ясалди. Ўз тарихида 10-маротаба ташкил этилаётган ушбу нуфузли турнирда жами 8 нафар гроссмейстер, улар қаторида ҳамюртимиз Нодирбек Абдусатторов ҳам иштирок этяпти. Мамлакатимизнинг биринчи рақамли шахматчиси мазкур мусобақанинг 2022 йилги чемпиони ҳисобланади. 

Нодирбек турнирнинг биринчи куни ўтказилган 3 та тур учрашувида 3 хил натижа қайд этганди. Ғалаба билан бошлаб, ўртада дуранг ва якунда мағлубият билан тугатган эди. Кеча ҳам у уч хил натижага эришди. Абдусатторов қора доналарда Владислав Артемьев билан муросага келди. Кейин оқ доналарда озарбайжонлик Шахрияр Мамедьяровга ютқазиб қўйди. 

Олтинчи турда яна оқ доналарда ўйнайди ва бу сафар Риччард Раппортни таслим этди. Рапиддаги иштирокини қора доналарда мезбонлар вакили Рауф Мамедовга қарши учрашув билан якунлади. Бу баҳсда ютқазиб туришига қарамай, якунда чиройли ғалабага эришди.

Шу тариқа, Вугар Гашимов турнирида рапид баҳслари якунига етди. Ян Непомняший 14 имкониятдан 10 очко жамғариб, блиц баҳслари олдидан турнир жадвалида якка пешқадамлик қиляпти. Шахрияр Мамедьяров 9 очко билан иккинчи ўринни банд этган бўлса, Артемьев ва Абдусатторов 8 очко билан кейинги поғоналардан жой олишган. Ҳамюртимиз қўшимча кўрсаткичларга кўра 4-ўринни эгаллаб турибди. 

Бугундан блиц йўналишидаги баҳсларга старт берилади. Нодирбек Абдусатторов блицнинг илк турида ҳиндистонлик гроссмейстер Аравинд Читамбарамга қарши оқ доналарда ҳаракат қилади. Вугар Гашимов халқаро хотира турнирининг амалдаги чемпиони ҳиндистонлик Видит Сантош мусобақага кела олмади. Унинг ўрнини айнан Читамбарам эгаллаган. 

Маълумот учун, норвегиялик Магнус Карлсен турнирнинг 4 карра ғолиби ҳисобланади. Шахрияр Мамедъяров икки бор чемпионликка эришган бўлса, Фабиано Каруана (АҚШ), Нодирбек Абдусатторов (Ўзбекистон) ва Видит Сантош (Ҳиндистон) бир маротабадан бош совринга эга чиққан.