Нодирбек Абдусатторовда дуранглар серияси давом этмоқда + ФОТО

Ўз ичига 5 та турнирни жамлаган ушбу нуфузли шахмат мусобақасининг умумий мукофот жамғармаси 1,5 миллион АҚШ долларини ташкил этади. Унда ҳамюртимиз Нодирбек Абдусатторов (2766) ҳам ўз маҳоратини намойиш этяпти. 

Кеча 8-тур учрашувлари ўтказилди ва эътиборлиси, бу турда ҳам барча партиялар дуранг натижа билан якунланди. Абдусатторов оқ доналарда мусобақа аутсайдери Богдан-Даньел Дяк (Руминия, 2680)га қарши баҳс олиб борди ва яна дурангга имзо чекди.

Турнирнинг биринчи рақамли иштирокчиси Фабиано Каруана (АҚШ, 2805) 8-турда Рамешбабу Прагнанандха (Ҳиндистон, 2747) билан муросага келди. Сўнгги тур олдидан турнир жадвалида ҳеч қандай ўзгариш кузатилмади. Каруана 5 очко билан якка пешқадамликни давом эттирмоқда. Фирузжа, Праггнанандҳа ва Гукеш ҳисобида 4,5 тадан очко бор. 

Нодирбек Абдусатторов эса 3,5 очко билан қўшимча кўрсаткичларга кўра 8-ўринни эгаллаб турибди. Уэсли Со ва Аниш Гири ҳисобида ҳам 3,5 тадан очко бор. Бугун Нодирбек сўнгги 9-турда қора доналарда турнирда иккинчи рақам остида сараланган Ян Непомнящий (FIDE, 2770)га қарши баҳс олиб боради. 

Маълумот учун, "Superbet Chess Classic Romania" турнирининг мукофот жамғармаси 350 000 АҚШ долларини ташкил қилади. Чемпион гроссмейстер 100 000 долларни қўлга киритади. 

Турнир иштирокчилари: Фабиано Каруана (АҚШ, 2805), Ян Непомнящий (FIDE, 2770), Нодирбек Абдусатторов (Ўзбекистон, 2766), Доммаражу Гукеш (Ҳиндистон, 2763), Уэсли Со (АҚШ, 2757), Рамешбабу Прагнанандха (Ҳиндистон, 2747), Аниш Гири (Нидерландия, 2745), Алиреза Фирузджа (Франция, 2737), Максим Вашье-Лаграв (Франция, 2732), Богдан-Даньел Дяк (Руминия, 2680).