Нодирбек Якуббоев Aktobe Open 2024 етакчилари сафига қўшилиб олди

Мукофот жамғармаси 100 000 АҚШ долларини ташкил этувчи Aktobe Open 2024 турнири анъанавий тарзда Владимир Дворкович хотирасига бағишлаб ўтказиб келиняпти. Дунёнинг кўзга кўринган гроссмейстерлари қаторида уч нафар шахматчимиз Нодирбек Якуббоев (2665), Муҳаммадзоҳид Суяров (2429) ва Муҳиддин Мадаминов (2504) ҳам совринли ўринлар учун дона сурмоқда.  

Мусобақанинг 6-турида уччала вакилимиз ҳам оқ доналарда ҳаракат қилишди. Якуббоев FIDE байроғи остида ўйнаётган Василий Корчмар (2424) устидан ғалабага эришиб, етакчилар сафига қўшилиб олди. Суяров яна бир FIDE байроғи остида ҳаракат қилаётган Сергей Лобанов (2506), Мадаминов эса кутилмаганда қозоғистонлик Сауат Нургалиев (2320)га имкониятни бой бериб қўйди. 

Бугун ўтказиладиган 7-тур олдидан ҳиндистонлик гроссмейстер Абҳижит Гупта 6 имкониятдан 5 очко жамғариб, қўшимча кўрсаткичларга кўра пешқадамлик қиляпти. Бу турда ғалаба қозонган Парҳам Мақсудлу (Эрон) ва Шант Саргсян (Арманистон) очколарини 5 тага етказиб, Гупта билан тенглашиб олишди. 4-12 ўринлардан жой олган шахматчилар 4,5 тадан очко жамғаришган. Улар сафида Нодирбек Якуббоев ҳам бор. 

Ҳамюртларимиз орасида энг яхши натижани ҳам ҳозирча Нодирбек Якуббоев қайд этмоқда. Муҳаммадзоҳид Суяров 3, Муҳиддин Мадаминов эса 2,5 очкога эга. Улар мос равишда 40 ва 56-ўринларни банд этишган. Бугун ўтказиладиган 7-турда шахматчиларимиз рақибларига қарши қора доналарда ҳаракат қилишади.        

Aktobe Open 2024. 7-тур жуфтликлари

Валентин Байдецкий (Австрия, 2482) - Нодирбек Якуббоев (2665) 

Ергали Сулеймен (Қозоғистон, 2254) - Муҳаммадзоҳид Суяров (2429)

Ораш Шоназаров (Қозоғистон, 2311) - Муҳиддин Мадаминов (2504) 

Маълумот учун, Aktobe Open 2024 турнири ғолиби 20 000 доллар мукофот пулига эга бўлади. Иккинчи ўрин соҳиби 15 600, учинчи ўрин эгаси эса 11 100 АҚШ долларини қўлга киритади.