Новак Жоковични ўз уйида мағлуб этишди

Serbia Open мусобақасининг ярим финалида кутилмаган натижа қайд этилди. Сайёрамизнинг биринчи ракеткаси, сербиялик Новак Жокович ярим финал учрашувида ATP рейтингининг 28-поғонасидан жой олиб турган россиялик Аслан Карацевга ютқазиб қўйди. 

Уч соату 26 дақиқа давом этган баҳсда Карацев номдор рақибини ва боз устига унинг ватанида 7/5, 4/6, 6/4 ҳисобларида таслим этишга муваффақ бўлди. Новак учрашув давомида 2 та, Аслан эса 6 та эйс зарбасини амалга оширди. Теннисчиларнинг ўзаро учрашувларидаги ҳисоб мувозанати ҳам тикланди - 1:1.