Нойер Европа чемпионатидан сўнг Германия терма жамоасидаги фаолиятини якунлайди

Бу ҳақда журналист Тоби Альтшаффль ўзининг ижтимоий тармоқдаги саҳифасида маълум қилди.

Манбага кўра, Евро-2024 Мануэль Нойер учун Германия терма жамоасидаги сўнгги турнир бўлади. Шундан сўнг, "Барселона" дарвозабони Марк-Андре тер Штеген терма жамоанинг биринчи рақамли посбонига айланади.

Олдинроқ Германия терма жамоаси бош мураббийи Юлиан Нагельсманн Европа чемпионати учун биринчи рақамли дарвозабон сифатида Нойерни танлагани маълум бўлганди. "Барселона" дарвозабони Марк-Андре тер Штеген эса бу қарордан норозилигини билдирди.

2024 йилги Европа чемпионати Германия майдонларида бўлиб ўтади. Турнир 14 июндан 14 июлга қадар давом этади. Гуруҳ босқичида биринчи ва иккинчи ўринни эгаллаган жамоалар ҳамда учинчи ўринни эгаллаган тўртта энг яхши жамоа 1/8 финалга йўл олади.