26 окт 08:48
Янгиликлар

Кураш

Нукусда белбоғли кураш бўйича Ўзбекистон кубоги бошланди

Қорақалпоғистон Республикаси Нукус шаҳридаги 2-сонли болалар-ўсмирлар спорт мактабида миллий белбоғли кураш бўйича 2001-2002 йилларда туғилган ўғил болалар ва қизлар ўртасида Ўзбекистон кубоги беллашувларига старт берилди.

Ўзбекистон Республикаси Жисмоний тарбия ва спорт вазирлиги ҳамда Ўзбекистон миллий белбоғли кураш федерациясининг йиллик тақвим-режасидаги ушбу мамлакат кубоги баҳсларида Қорақалпоғистон Республикаси, Тошкент шаҳри ва барча вилоятлардан икки юз эллик нафарга яқин спортчилар иштирок этмоқда.

Мазкур Ўзбекистон кубоги мусобақасида ўғил болалар эркин ва классик йўналишларда ўн битта вазн тоифасида, қизлар эса эркин йўналишда еттита вазнда куч синашишмоқда.

Шунингдек, мусобақанинг дастлабки кунида тантанали очилиш маросими ҳам ташкил этилди. Маросимда спортчи жамоаларнинг кўргазмали чиқишлари йиғилганлар кўнглига хушнудлик бағишлади. Беллашувлар 28 октябрга қадар давом этади.