12 июн 08:08
Янгиликлар

Бокс/ММА

Нурмагомедов "Жангчилар ороли"да октагонга кўтарилади

Россиялик аралаш қоидалар жангчиси Умар Нурмагомедов UFC промоушенидаги дебют жангини "Жангчилар ороли"да ўтказадиган бўлди.

Умар Нурмагомедов енгил вазн тоифасида UFC чемпиони Хабиб Нурмагомедовнинг жияни ҳисобланади. Умар ўтган йили Тошкентда GFC 20 турнирининг марказий жангида аргентиналик рақибига қарши октагонга кўтарилиб, ғалаба қозонган ва шундан сўнг UFC билан шартнома имзолаган эди.

Хабиб ва Умар Нурмагомедовнинг менежери ҳисобланган Ризван Магомедовнинг айтишича, кичик Нурмагомедовнинг UFC промоушенидаги дебют жанги Абу-Дабидаги "Жангчилар ороли"да бўлиб ўтади.

"Июль, "Жангчилар ороли", — дея Ризван Магомедовнинг сўзларини келтирмоқда ТАСС.

Ҳозирча Умар Нурмагомедовнинг жанги UFCнинг айнан қайси турнирида ўтказилиши маълум эмас. Промоушен 11 июлдан 25 июлгача "Жангчилар ороли"да жами тўртта турнир ўтказади.

Аслида Умар Нурмагомедов UFCдаги дебютини 18 апрель куни UFC 249 турнирида ўтказиши керак эди. Лекин пандемия сабаб бу дебют бекор бўлганди. 24 ёшли Умар ҳисобида ММАда ўтказилган 12 та жанг бор. У барча жангларда ғалабага эришган.