Одилов ва Тоштемировда олтин, Гулжаной икки карра Паралимпия ўйинлари совриндори!

Кечки дастурда пара таэквондо бўйича эркаклар ўртасида -80 кг вазн тоифасида юртимиз шарафини ҳимоя қилган Асад Тоштемиров мексикалик Луис Марио Нажерани 38:17 ҳисобида енгиб, Паралимпия чемпионига айланди. 

Ўзбекистон делегациясига яна бир олтин медални пара енгил атлетикачимиз тақдим этди. F57 классининг найза улоқтириш баҳсларида қатнашган Ёрқинбек Одилов чемпионлик шоҳсупасига кўтарилди. Токио-2020 ёзги Паралимпия ўйинларини тўртинчи ўринда якунлаган Ёрқинбек мусобақада 50.32 метр натижа кўрсатди.

Маҳоратли пара таэквондочимиз Гулжаной Наимова эса Паралимпия ўйинларидаги иккинчи медалини қўлга киритди. К44 классида +65 кг вазн тоифасида қатнашган ҳамюртимиз британиялик Эми Трюсдейлга қарши чемпионлик жангида жароҳат сабаб баҳсни якунлай олмади ва кумуш медаль билан чекланди.

Таъкидлаш жоиз, бу Гулжаной учун Паралимпия ўйинларидаги иккинчи медаль бўлди. Токио-2020 ёзги Паралимпия ўйинларида у олтин медалга эга чиққан эди. 

Шу тариқа, делегациямиз ҳисобидаги медаллар ҳозрича 5 та олтин, 3 та кумуш ва 3 та бронзани ташкил этмоқда.