Оғир атлетика бўйича Ироқ термаси допинг сабаб Олимпиададан четлатилиши мумкин

Маълум қилинишича, Алайфури Салван, Ахмад Ал-Хуссайн ва Сафаа Алжумайли допинг қабул қилганлиги айтилмоқда. Ҳозирча уларнинг ҳеч бири дисквалификация қилинганича йўқ. Ажумайли олдинроқ, яъни 2013 йил тақиқланган модда станозолдан фойдалангани учун икки йил муддатга мусобақалардан четлатилганди. Атлет 2018 Осиё ўйинларида зафар қучган ва Лондон Олимпиадаси-2012да 10-ўринни эгаллаган.

Агар оғир атлетикачиларнинг айби аниқланса, бу ироқлик атлетлар учун 2008 йил Пекинда бўлган Олимпиадан буён шу каби 10-ҳолат бўлади. Шу билан бирга Ироқ терма жамоаси Токиода ўтиши режалаштирилган Олимпиададан буткул четлатилиши мумкин. Спортчилари бир йил ичида антидопинг қоидаларини уч ва ундан кўп маротаба бузган мамлакат барча халқаро мусобақалардан тўрт йилгача дисквалификация қилиниши мумкин. Ироқ оғир атлетика федерацияси эса 50 минг доллар жаримага тортилиши мумкин.