Оғир атлетика: Жаҳон чемпионати совриндори муносиб кутиб олинди

Жаҳон чемпионати совриндорини Наманган вилояти ҳокими Хайрулло Бозоров ҳамда вилоят жисмоний тарбия ва спорт бошқармаси бошлиғи Шокиржон Қорабоев кутиб олди ва Токио-2020 Олимпиадаси олтин медаллари йўлидаги навбатдаги қадам билан қутлади.

Хайрулло Бозоров, спортчини жаҳон чемпионатида эришган натижаси билан қутлар экан, Наманган вилоятининг Адҳамжонга ишончи катта эканини қайд этди. Адҳамжон Эргашевга вилоят ҳокимининг пул мукофоти ҳам топширилди.

Жаҳон чемпионатида 67 кг вазнда иштирок этган ўсмирлар ва ёшлар ўртасида кўп карра жаҳон чемпиони, янгиқўрғонлик атлет Адҳамжон Эргашев даст кўтаришда 146 кг натижа билан тўртинчи ўринни эгаллаган бўлса, силтаб кўтаришда 182 кг натижа кўрсатиб, учинчи ўринни қўлга киритди. Адҳамжон, бронза медали билан бирга Токио Олимпиадаси йўлланмаси учун қимматли очколарни ҳам қўлга киритди.

Адҳамжон Эргашев Таиландда бўлиб ўтган мусобақада кўрсатган натижаси билан катталар ўртасида жаҳон чемпионати совриндори бўлиш билан бирга, ўз ёш тоифасида 7 та жаҳон рекордини ҳам янгилади.

“Олимпиадада ғолибликни қўлга киритиш жуда катта натижа бўлади. Халқаро майдонда Ўзбекистон байроғи юқори кўтарилади. Бундан ташқари, минглаб ёшларимизда ҳавас уйғонади, спортга кириб келишади, чемпионлар ортидан эргашишади” деб таъкидлади вилоят ҳокими.

Адҳамжон Эргашев Токиодан Олимпиада олтин медали билан қайтиб, ўзига билдирилаётган ишонч ва умидларни тўла оқлаш ниятида эканлигини айтиб, миннатдорчилик билдирди.