Оғир атлетика. Милан Михайлович ЎзДЖТСУда семинар ўтказди

Бугун, 13 февраль куни Белград давлат университети профессори, Сербия оғир атлетика федерацияси президенти, Халқаро Оғир атлетика федерацияси техник комитет аъзоси, Европа оғир атлетика федерацияси мураббийлик ва илмий изланиш комитети аъзоси Милан Михайлович Ўзбекистон давлат жисмоний тарбия ва спорт университетда меҳмон бўлди.

Даставвал меҳмон университетда талабалар учун яратилган шарт-шароитлар билан яқиндан танишди ҳамда оғир атлетика таълим йўналишида теҳсил олаётган талабалар учун семинар ташкил этилди.

Семинарда сербиялик олим спорт соҳасидаги илмий тадқиқот ишларида инновациялардан фойдаланиш, илмий-ижодий янгиликлар ва креатив лойиҳалардан фойдаланиш борасида талабаларга зарур тавсияларини берди.

Шундан сўнг Ўзбекистон давлат жисмоний тарбия ва спорт университети ректори, профессор Махмуджон Болтабаев билан расмий учрашув бўлиб ўтди.

Учрашувда ўзаро ҳамкорлик алоқаларини янада ривожлантириш, айниқса талабаларга оғир атлетика таълим йўналишларида замонавий билимларни бериш, уларнинг интеллектуал салоҳиятини ошириш, ўзаро тажриба алмашиш масалалари келишиб олинди. Шунингдек, Сербиядаги жисмоний тарбия ва спорт олий таълим муасасалари билан алоқалар ўрнатиш бўйича таклифлар кўриб чиқилди.

Маълумот учун, Милан Михайлович пойтахтимизда ўтказилган 6-Халқаро бирдамлик мусобақасида иштирок этди. 2020 йил 14 февралда бошланадиган ўсмирлар ва ёшлар ўртасидаги Осиё чемпионатида ҳам қатнашиши режалаштирилган.

ЎзДЖТСУ матбуот хизмати