Оғир атлетика: Набиева ҳам ЖЧнинг бронза медалини қўлга киритди

Бугунги беллашувларни эркаклар ўртасида -67 кг вазн тоифасидаги атлетлар бошлаб берган ва унда ҳамюртимиз, ёшлар ўртасида жаҳон чемпиони Адҳамжон Эргашев бронза медалига сазовор бўлгани ҳақида хабар бергандик.

Жаҳон чемпионатининг бугунги дастуридан ўрин олган аёллар ўртасида -55 кг вазн тоифасидаги баҳсларда терма жамоамизнинг ёш ва умидли спортчиларидан бири Муаттар Набиева ҳам совриндорга айланди. У силтаб кўтариш машқларида 96 килограмлик тошни ўзига бўйсундирди ва кичик бронза медалига сазовор бўлди.

Афсуски силтаб кўтариш машқларида Муаттарнинг омади юришмади. У аввалига 112 кг, кейин эса 113 кг тошни кўтаришда хатога йўл қўйди ва ниҳоят учинчи уринишда 116 кг натижа қайд этди. Натижада ҳамюртимиз силтаб кўтариш ва икки кураш мусобақалари якунига кўра 6-ўрин билан кифояланди.

Шунга қарамай Муаттар Набиева ҳам Токио-2020 олимпиадаси учун жуда муҳим бўлган рейтинг очколарини қўлга киритди ва келгуси йил Япония давлатида бўладиган тўрт йилликнинг нуфузли мусобақаси сари муҳим қадам ташлади.