Оғир атлетика. Сарварбек Зафаржонов терма жамоамиз ҳисобига навбатдаги медалларни қўшиб қўйди

Ҳозиргина -89 кг вазн тоифасида эркаклар ўртасидаги кураш якунига етди, деб хабар беради оғир атлетика федерацияси матбуот хизмати.  

Ушбу вазнда юртимиз шарафини Сарварбек Зафаржонов ҳимоя қилди. Ёш спортчимиз ўзидан анча катта атлетларга қарши курашда ишончли ҳаракат қилди. 

Даст кўтариш машқида бор йўғи 1 кг Зафаржоновни шоҳсупадан четда қолдирган бўлса, силтаб кўтариш машқида фақатгина россиялик Артём Акулов 205 кг оғирликни биринчи бўйсундиргани учунгина ҳамюртимиздан юқорироқ ўринни банд этди.

Шунингдек, икки кураш натижасига кўра олтин учун курашда Сарварбек кореялик Ю Донг Жу билан охиригача кураш олиб борди ва бир хил натижа қайд этди. Аммо яна меҳмон спортчи ушбу натижани биринчи қайд этгани сабаб, атлетимиз кумуш билан чекланди. 

Қайд этиш лозим, ёши энг кичик рақобатчиси ҳамюртимиздан 4 ёш катта бўлишига, қарамай, Зафаржонов иккита кумуш медални қўл киритди. 

Навбатдаги медаллар билан барча юртдошларимизни муборакбод этамиз. 

Катталар ўртасида жаҳон чемпионати

Эркаклар, -89 кг.

1. Ю Донг Жу (Жанубий Корея) - 371 (167+204) кг;

2. Сарварбек Зафаржонов (Ўзбекистон) - 371 кг (166+205); 

3. Давитадзе Реваз (Грузия) - 370 (171+199) кг.