Оғир атлетика: Тошкентдаги ЖЧ олдидан ташкилий қўмита йиғилиши ўтказилди

Шунингдек, 19-21-декабр кунлари пойтахтимизда Халқаро оғир атлетика федерациясининг навбатдаги Конгресси ҳам ташкил этилиши режалаштирилган.

Шу муносабат билан бугун “Юнусобод” спорт мажмуасида жаҳон чемпионатини ўтказиш бўйича ташкилий қўмита йиғилиши бўлди. Унга Туризм ва спорт вазири ўринбосари Авазжон Каримов раислик қилди.

Таъкидлаш лозим, мазкур жаҳон чемпионатида дунёнинг 90та давлатидан жами 480 нафар спортчи (шундан 190 нафари аёллар) 20та вазн тоифасида 60та медаллар жамланмаси учун баҳс олиб боришади.

Сайёрамизда пандемик вазият яна жиддий тус олаётган бўлишига қарамай, дунё спорт жамоатчилиги Ўзбекистондаги вазиятдан хотиржам ва шу боис Тошкентдаги мусобақага жаҳоннинг деярли барча етакчи давлатлари иштирок этиш истагини билдиришмоқда.

Йиғилишда жаҳон чемпионатини юқори савияда ўтказиш, меҳмонларни кутиб олишдан тортиб мусобақа жараёнларигача халқаро талаблар даражасида ташкил этиш кераклиги таъкидланди. Бу йўлда барча вазирлик ва идоралар ҳамжиҳатликда ҳаракат қилиши лозим. 

Зотан, ушбу жаҳон чемпионати каби нуфузли мусобақалар Ўзбекистон томони учун Тошкент-2025 ёшлар ўртасида Осиё ўйинлари олдидан ўзига хос имтиҳон вазифасини ўтаб беради.