Оксана Чусовитина Ислом Бирдамлик ўйинларида қатнашади. Терма жамоа таркиби маълум

Ушбу нуфузли мусобақага Ўзбекистон гимнастика терма жамоаси ҳам қизғин тайёргарлик кўрмоқда. Ўзбекистонлик гимнастлар турнирда ушбу спорт турининг деярли барча турларида иштирок этади. Ислом Бирдамлик ўйинларида юртимиз шарафини ҳимоя қиладиган терма жамоамиз таркиби эълон қилинди. Унга кўра, эркаклар терма жамоасидан Абдулла Азимов, Хабибулло Эргашев ва Расулжон Абдураҳимовлар ўрин олган бўлса, аёллар терма жамоаси таркибидан Оксана Чусовитина, Дилдора Арипова, Оминахон Халилова жой олди. Гулназ Жумабекова ва Лобар Амриллаева захирада қолган. Эслатиб ўтамиз, Оксана Чусовитина Бокуда ўтказилган сўнгги Ислом Бирдамлик ўйинларида таяниб сакрашда олтин медални қўлга киритган эди. 

Бу йил Коньяда бадиий гимнастика бўйича индивидуал чиқишлар билан бир қаторда биринчи марта гуруҳ машқлари ҳам дастурга киритилди. Ва албатта, Ўзбекистон бош соврин учун асосий даъвогарлар қаторида эътироф этилмоқда. Гуруҳ машқларида Шахзода Ибрагимова, Наргиза Жуманиязова, Мумтоза Исхоқзода, Нилуфар Аъзамова, Мария Пак ва Хуршида Абдурауфова юртимиз шарафини ҳимоя қилса, индивидуал баҳсларда Таҳмина Икромова ва Сабина Ташкенбаева чиқиш қилади. Яккалик дастурида мусобақада иштирок этадиган учинчи вакиламиз номи эса ҳали номаълум. Ҳозирча Екатерина Фетисова ва Ясмина Раҳимованинг имкониятлари тенг ва якунда қайси спортчи мусобақада иштирок этиши назорат машғулотларидан сўнг маълум бўлади.