Оксана Чусовитина: “Мураббийнинг маошини кўтармай, яхши натижага эришиш қийин”

42 ёшни қаршилаган ва ҳали катта спортдан кетиш ҳақида умуман ўйламаётган Оксана билан суҳбатимиз қизиқарли кечганди. Саволлардан бири мураббийларимизнинг савияси ҳақида бўлди.  

– Мураббийнинг маошини кўтариш орқали натижани яхшилаш мумкин, - деди гимнастикачимиз. - Бу исбот талаб қилмайдиган аксиома. Мураббийнинг маошини етарли даражада кўтариб қўйинг, у сунъий равишда қўшимча гуруҳларни очмайди.

Мураббий маоши фарзандларини тўкис таъминлаш учун етмаганидан шунга мажбур бўляпти. Қачонки мураббий залда спортчилар билан 8 соат ишламас экан, натижа ҳеч қачон ижобий бўлмайди. Мураббийнинг меҳри ҳаммага етмайди.

Мураббий битта залдаги ишини тезроқ тугатиб, иккинчисига боришга ҳаракат қилади. Чунки, шундай қилмаса бўлмайди. Мен бу ерда мураббийни танқид қилмоқчи эмасман. Уларни ҳам тўғри тушуниш керак. Ўзи истамаган ҳолда бу ишларга қўл уряпти. Шу боис, мураббийнинг маошини ошириш керак.