Оксана Чусовитина ўтирган самолётда бомба бўлган экан

42 ёшли қаршилаган ва ҳали катта спортдан кетиш ҳақида умуман ўйламаётган Оксана билан суҳбатимиз жуда ҳам қизиқарли ва хушчақчақ тарзда ўтди. Чусовитина суҳбат сўнггида қизиқарли маълумотни айтиб берди. Уни сизларга ҳам илинишни лозим топдик.

– Ўтган йили АҚШдан Германиянинг Франкфурт шаҳрига учаётганимда мен жой олган самолёт бортида бомба бўлган, - деди гимнастикачимиз. - Ҳа, бу ҳазил гап эмас, айни ҳақиқат. Биз фавқулодда Нью-Йорк халқаро аэропортига қўнишга мажбур бўлгандик. Океан устида шундай кўринмас чизиқ борки, самолёт ундан ўтганидан кейин хоҳласа ҳам ортга қайта олмайди. Бахтимизга ўша кўринмас чегарадан ўтмаган эканмиз.

Энг қизиғи, самолёт пилотлари ихтиёрида 7 дақиқа вақт бор эди. Ана шу вақт ичида биз тахминан 10-15 минг метр баландликдан аэропортга қўнишимиз шарт бўлган. Самолёт икки дақиқада пастга эркин ва мажбурий “шўнғиш”ни амалга ошириши керак эди.

Эътиборлиси, ўша пайтда ухлаб қолган эканман. Очиғи, нима бўлаётганини тушунмаганман. Нимага Нью-Йоркка қўндик, нима учун ҳаммани эвакуация қилишяпти? Худди кинога ўхшайди. Ҳалигача бу дахшатли воқеани эслаганимда, кўз ўнгим қоронғилашиб кетади.  

Биласизми, самолёт бортида оз эмас, кўп эмас 500 нафар йўловчи бўлган. Пилот самолёт бортига бомба қўйилганлиги ҳақидаги хабарни ўша заҳоти айтганди. Чунки, халқаро меъёрларга кўра, пилот бу ҳақда бортдагиларга хабар бериши ва уларни огоҳлантириши шарт экан.

Кимдир йиғларди, айримлар илтижо қилишга тушиб кетишганди. Ҳақиқатан ҳам, дахшатли воқеа бўлганди. Натижада рейсимиз бекор қилинган эди. Ўзи ундан аввал ҳам парвозлардан қўрқар эдим. Ўтган йилги воқеадан сўнг қўрқув яна ошди.