Olamsport инсайди тасдиқланди: россиялик истиқболли теннисчи энди Ўзбекистон шарафини ҳимоя қилади, у биринчи рақамли теннисчимизга айланди

Куни кеча WTA россиялик 21 яшар ракетка устаси Мария Тимофеева эндиликда Ўзбекистон номидан мусобақаларда иштирок этиши ҳақида маълум қилди.

Мария ҳозирда жаҳон рейтингида 146-ўринни эгаллаб турибди. У 19 октябрь куни Португалиядаги ITF W75 турнирида ғалаба қозонган эди. Унинг фаолияти давомидаги энг юқори рейтинги 93-ўрин бўлган.

Москвада туғилган Тимофеева Словениянинг Копер шаҳрида Анья Морель мураббийлиги остида шуғулланади. 2023 йилда у Будапештдаги турнир финалида украиналик Катерина Беиндлни мағлуб этиб, ўзининг биринчи WТА Tour чемпионлигини қўлга киритганди. Кейин эса оёғидан олган жароҳати туфайли уч ойлик танаффус олганди.

2024 йилда Мария Тимофеева Австралия Очиқ чемпионатида дебют қилди (саралаш босқичидан ўтди) ва тўртинчи босқичга қадар етиб борди. Мариянинг фаолияти давомида ишлаб топган мукофот пуллари 796 826 долларни ташкил қилади.

Спортчининг ижтимоий тармоқлардаги саҳифасига назар ташлайдиган бўлсак, унинг сентябрь ойи охирида Тошкент шаҳрида бўлганини кўриш мумкин.