Олимпиада-2024 чемпиони Иман Хелиф World Boxing ташкилотини судга берди

Олимпия ўйинларининг аёллар ўртасидаги 66 кг вазн тоифаси чемпиони World Boxing устидан Спортив арбитраж суди (CAS)га апелляция киритди. World Boxing бир муддат аввал Хелифни гендер тести сабаб эртага Англиянинг Ливерпуль шаҳрида бошланадиган жаҳон чемпионатида иштирок этишига рухсат бермаганди.  

Суд Иманнинг гендер тести тўғрисидаги қоиданинг амал қилишини суд мажлиси бошлангунга қадар тўхтатиб туриш тўғрисидаги илтимосномасини қаноатлантиришни рад этган. Хелиф, шунингдек гендер тести топширишдан олдин World Boxing шафелигидаги турнирларда иштирок этиш тақиқини олиб ташлашни ва аёллар ўртасидаги жаҳон чемпионатида қатнашиш учун рухсат беришларини талаб қилмоқда. 

Эслатиб ўтамиз, World Boxing ташкилоти боксчиларни аёллар ва эркаклар ўртасидаги мусобақаларга қўйиш учун улар ўртасида мажбурий гендер тестини жорий этишини эълон қилган эди.