Олимпиада-2024 лицензианти Бекзод Абдураҳмонов Парижга бормаслиги мумкин

74 кг вазн тоифасида юртимиз шарафини ҳимоя қилган Токио Олимпиадасининг бронза медали совриндори 1/2 финалда қирғизистонлик Орозобек Токтомамбетовни 6-0 ҳисобида мағлубиятга учратган ва терма жамоамизга навбатдаги лицензияни тақдим этганди. Бу Абдураҳмонов учун учинчи Олимпиада бўлиши керак.

Аммо шошилишга бироз эрта экани кеча тарқалган хабарларда аён бўлди. Гап шундаки, Бекзод Абдураҳмонов Париж-2024 Олимпиадасига бормаслиги, унинг ўрнини маҳаллийлаштирилган россиялик "легионер" Разамбек Жамалов эгаллаши мумкин. Спорт курашларида ҳам қоида бўйича худди оғир атлетикага ўхшаб лицензия жамоага берилади. Мураббийлар штаби хоҳласа, Абдураҳмоновнинг лицензиясини кучли қолдириши ҳам мумкин. 

Биздаги маълумотларга кўра, яхши ният билан Ўзбекистон фуқаролиги берилган Жамалов ҳозирда ўзининг яхши спорт формасига кириб олган. Бекзод ҳам ёмон спорт формада эмас, акс ҳолда Олимпиада лицензиясини ютиб олмасди. Хасавюртлик Жамалов икки карра (2020, 2022) Россия чемпиони ҳисобланади. Россия чемпионатининг финалида Олимпиада чемпиони Заурбек Сидаков билан тенгма-тенг курашган. Истеъдодига шубҳа йўқ, лекин сўнгги йилларда жароҳатлар исканжасига тушиб қолди ва бунинг натижасида жуда кўп мусобақаларда иштирок эта олмади. 

Хуллас, Ўзбекистон спорт курашлари тарихида илк бор Олимпиадага борадиган курашчини шу йўл билан аниқлаймиз. Ушбу мини турнир 6-9 июнь кунлари Венгрия пойтахти Будапешт шаҳрида бўлиб ўтади. Унда энг яхши натижа қайд этган курашчи 74 кг вазн тоифасида Ўзбекистон номидан Париж-2024 Олимпиадасига боради. У Бекзод Абдураҳмонов бўладими ёки Разамбек Жамалов, буни тез орада билиб оламиз. 

Мураббийлар штаби ёки бошқа шахсларнинг шу йўл билан энг яхши курашчини аниқлаши қанчалик тўғри қарор бўлганини Париж Олимпиадасида билиб оламиз.