Олимпиада лицензианти Диёра Келдиёровани табриклаймиз!

Диёра Келдиёрова Самарқанд вилоятининг Пастдарғом тумани Жума шаҳарчасида туғилган. Биринчи мураббийи - Хуршида Холиқова. Самарқанд давлат университети талабаси. Токио Олимпиадаси лицензианти. У -52 кг вазн тоифасидаги беллашувларда юртимиз шарафини ҳимоя қилади. 

Диёра 2015 йил Босния ва Герцеговиниянинг Сараево шаҳрида ўтказилган кадетлар ўртасидаги жаҳон чемпионатида йўлидан чиққан барча рақибаларини мағлубиятга учратиб, олтин медални қўлга киритган. Икки йил аввал Хитойнинг Циндао шаҳрида ўтган "Мастерс" турнирида бронза медалига эга чиққан. Бу йил эса Анталияда шохсупанинг энг юқори поғонасига кўтарилиб, ўзбек дзюдосида янги тарих саҳифаси очилишига сабабчи бўлди. Венгриядаги жаҳон чемпионатида кучли бешликдан жой олди. 

Фурсатдан фойдаланиб, Ўзбекистон дзюдо федерацияси раҳбарияти, мураббийлар штаби ва дзюдочилар номидан Диёра Келдиёровани бугунги таваллуд айёми билан муборакбод этамиз. Токио Олимпиадасида ғалаба ва омад ёр бўлсин, ДИЁРА!