Олимпиада лицензианти Ғуломжон Абдуллаев Poland Open ғолиби!

Poland Open рейтинг турнирида дунёнинг кўзга кўринган, аксари Токио Олимпиадасига йўлланма қўлга киритган эркин, юнон-рум ва аёллар кураши вакиллари иштирок этяпти. Улар орасида юртимиз шарафини эркин ва юнон-рум курашчиларимиз ҳимоя қилишмоқда.  

Қувонарлиси, бугун халқаро турнирнинг иккинчи куни эркин курашчимиз Ғуломжон Абдуллаев барча рақибларини мағлубиятга учратиб, олтин медаль соҳибига айланди. Токио Олимпиадаси лицензианти 61 кг вазн тоифасида иштирок этди. 

Хоразмлик 22 ёшли курашчимиз гарчи илк даврада ҳиндистонлик Рави Кумарга имкониятни бой бериб қўйган бўлса-да, якунда чемпионлик шоҳсупасига кўтарилишни уддалади. Ғуломжон иккинчи даврада АҚШ вакили Натан Ҳалид Томаселло (12-1), учинчи босқичда қозоғистонлик Адлан Аскаров (11-0), ярим финалда яна бир қозоқ курашчиси Нурислам Санаевни 11-3 ҳисобида таслим этди. Олтин медаль учун кечган беллашувда эса Кумар Равини 5-3 ҳисобида енгиб, чемпионлик билан бирга биринчи даврадаги мағлубият учун реванш ҳам олди.