Олимпиада сари: Тарихда илк бор камондан отиш баҳсларида қатнашамиз (Барча тафсилотлар)

Olamsport.com нашри шу муносабат билан Париж-2024 Олимпиадасидаги ўзбекистонлик спортчиларнинг иштирокига оид қизиқарли маълумотларни бўлишиб боради.

Бу йилги мусобақада тарихда илк бор ўзбекистонлик спортчилар камондан ўқ отиш баҳсларида иштирок этади.

Беллашувларда икки нафар ҳамюртимиз — Зиёдахон Абдусатторова ҳамда Амирхон Содиқов юртимиз шарафини ҳимоя қилади.

Зиёдахон Абдусатторова 2023 йил ноябрь ойида Таиланднинг Бангкок шаҳрида ўтказилган Осиё лицензион турнирида яккалик дастурида финалга қадар етиб бориб, тўрт йилликнинг энг муҳим мусобақаси учун йўлланмага эга чиққан эди.

Мусобақадан кейин берган интерюсида Зиёдахон у учун барча узилган ўқлар муҳим экани, ўқ узишдан олдин хаёли фақатгина 10 очкони кўзлашда бўлишини айтиб ўтган эди.

Олимпиадада Абдусатторова иштирок этадиган аёллар ўртасидаги индивидуал баҳслар 25 июль кунидан старт олади. Беллашувларда умумий 64 нафар спортчи ғолиблик учун кураш олиб боради. Улар дастлаб, рейтинг баҳсларини ўтказишади. Шундан сўнг, 4 август санасидан бошлаб, асосий беллашувлар бошланади.

Амирхон Содиқов қатнашадиган эркаклар ўртасидаги яккалик дастурида ҳам ҳудди шундай ҳолат. Аёллар ўртасидаги яккалик беллашувларига 3 август, эркаклар баҳсларига 4 август куни якун ясалади. 

Бундан ташқари, Зиёдахон ва Амирхон микст дастурида ҳам чиқиш қилади. Ушбу дастурдаги ўйинлар 2 август куни ўтказилади. 

Маълумот учун, камондан ўқ отиш баҳсларида энг кўп лицензиялар Хитой, Хитой Тайпейи, Франция (мезбонлик ҳуқуқи туфайли), Буюк Британия, Ҳиндистон, Мексика, Корея Республикасига насиб этган (6).